Ĉina prezidanto Xi Jinping ĵaŭde matene ĉeestis la bonvenigan ceremonion aranĝitan de la usona prezidento Donald Trump kaj faris paroladon ĉe la Blanka Domo.

Xi diris, ke li tre ĝojas fari ŝtatan viziton al la bela Unuiĝintaj Ŝtatoj de Ameriko, kaj li dankas prezidenton Trump kaj lian edzinon pro la varma gastigo al li kaj lia edzino. Nome de la pli ol 1,4 miliardoj da ĉinaj popolanoj, li esprimas sincerajn salutojn al la usona popolo kaj varmajn gratulojn pro la 250-a datreveno de la sendependiĝo de Usono.

“Ĉinio kaj Usono estas ambaŭ grandaj landoj, kaj la ĉina popolo kaj la usona popolo estas ambaŭ grandaj popoloj. Ĉi-foje, invitite de prezidento Trump, mi vizitas Usonon por heredigi amikecon, por vastigi kunlaboron kaj por plibonigi la bonfarton de la popoloj de la du landoj.”

Frontante la ŝanĝojn de la nuna mondo, de la epoko kaj de la historio, la du grandaj landoj Ĉinio kaj Usono portas la historian respondecon antaŭenigi la disvolviĝon kaj progreson de la homaro.

Dum la vizito de prezidento Trump en Ĉinio ĉijare, ni unuanime konsentis konstrui konstruemajn strategiajn stabilajn rilatojn inter Ĉinio kaj Usono, kio estas vaste bonvenigata de la popoloj de la du landoj kaj de la internacia komunumo. Mi volas klopodi kune kun prezidento Trump por gvidi ĉi tiun grandan ŝipon de la dulandaj rilatoj al stabila kaj longdaŭra vojaĝo.”

—— Ni devas plifortigi komunikadon. La naciaj kondiĉoj de Ĉinio kaj Usono diferencas, sed per sinceraj, profundaj kaj daŭraj dialogoj ni povas pliigi komprenon, serĉi komunan terenon konservante diferencojn kaj multigi reciprokan fidon. Ni instigas diversajn departementojn de la du landoj pri diplomatio, ekonomio kaj komerco, financo, leĝplenumado, kulturo kaj aliaj kampoj plifortigi komunikadon, kaj subtenas la leĝdonajn instituciojn de la du landoj vastigi interŝanĝojn.

—— Ni devas sincere kunlabori. La interesoj de Ĉinio kaj Usono estas profunde interplektitaj, kaj la spaco por kunlaboro estas tre vasta. Kvankam kunlaboro inter Ĉinio kaj Usono ne povas solvi ĉiujn problemojn en la mondo, sen kunlaboro de la du landoj multaj problemoj en la mondo estas malfacile solveblaj. La pordo de Ĉinio al la mondo ĉiam restas malfermita; ni bonvenigas usonajn entreprenojn investi kaj establi entreprenojn en Ĉinio, kaj ni esperas, ke Usono traktos ĉinajn entreprenojn juste, kaj ke ni kune plilongigu la liston de kunlaboro kaj mallongigu la liston de problemoj. Ĉinio kaj Usono ambaŭ estas grandaj landoj en artefarita intelekto, kaj ili havas kaj la kapablon kaj la respondecon bone disvolvi kaj bone regadi artefaritan intelekton, certigante, ke la disvolviĝo de artefarita intelekto ĉiam restu sub homa kontrolo kaj profitu  la popolon. Ĉinio volas plifortigi kunlaboron kun Usono pri kontraŭdrogado, leĝplenumado kaj aliaj kampoj. La du flankoj povas pliigi rektajn flugojn, por ke la personaj kaj ekonomiaj interŝanĝoj inter la du flankoj estu pli oportunaj.

—— Ni devas pace kunvivi. Ĉinio kaj Usono devas teni la fundamentan limon de ne-konflikto kaj ne-kontraŭstaro, kaj ili certe povas trovi ĝustan vojon por kunvivado de du grandaj landoj sur ĉi tiu planedo. La armeoj de la du landoj devas konservi regulajn dialogojn kaj perfektigi mekanismojn de kriza komunikado kaj preventado. La "Kaptilo de Tukidido" estas transirebla.

Transprenita el CGTN,

Originala ligilo: https://esperanto.cgtn.com/2026/09/24/ARTI1790264641415869